Nafarroako Bizikidetzaren II. Plan Estrategikoa
Erlazionatutako edukiak:
2025-2029 aldirako Nafarroako Bizikidetzarako II. Plan Estrategikoa 2025eko abenduaren 23an onartu zuen Nafarroako Gobernuak. Bigarren plan hau Nafarroako Bizikidetzarako I. Plan Estrategikoa garatu eta gauzatu ondoren sortu da, helburu orokor honekin: "Bizikidetza berdintasunean eta askatasunean eraikitzea Nafarroa demokratiko, plural eta askotariko batean, indarkeria tresna politiko gisa deslegitimatuz"
Planak kontuan hartzen ditu Nafarroako bizikidetzaren egungo errealitatea baldintzatzen duten egiturazko esparruaren elementu nagusiak, eta, bestalde, pertsonen, gizarte-taldeen eta erakundeen artean sortzen diren tentsio eta harreman nagusiak.
Planaren egitura hiru ardatz estrategiko handiren inguruan egituratzen da, eta ardatz horiek, era berean, sei eremutan banatutako 117 neurri biltzen dituzte (Giza Eskubideen aplikazioa; identitate, sexu- eta genero-aukera, hizkuntza, laiko eta erlijio-aukera, kultura eta jatorri desberdinen arteko bizikidetza; frankismoaren, terrorismoaren eta indarkeria politikoaren biktimen eskubideak aitortzea eta aplikatzea; memoria kritiko eta inklusiboa eraikitzea; elkarrekin bizitzeko hezteko eta ikasteko beharra; eta erakundeek bizikidetzaren erreferente izateko duten zeregina). Edukiari dagokionez, batetik, bizikidetza politikoarekin zerikusia duen guztian sakontzen du, eta, aldi berean, aniztasuneko gizarte- eta kultura-bizikidetzaren ikuspegi zabal eta irekia hartzen du. Plangintza horren bidez, bizikidetzako helburuetara bideratzen diren baliabideen administrazioa hobetzea espero da, Jaurlaritzaren ekintza harmonizatuz eta koordinatuz, dauden programak gizarte-ekimen berriekin osatuz eta emaitzak optimizatuz.
Ardatz estrategikoak honako hauek dira:
1. ardatza. Memoria, biktimak eta bizikidetza politikoa.
2. ardatza. Aniztasunean elkarrekin bizitzea.
3. ardatza. Bizikidetza eta giza eskubideak.
Planak 2025-2029 aldirako gauzatze-aldia hartzen du, eta 17.405.574,32 euroko aurrekontua du.