Jardunaldia: integritate publikoa, agenda instituzionalak eta interes-taldeak

Nafarroako Gobernuak jardunaldi bat antolatu du honako hauetan ditugun erronka berriez gogoeta egiteko: gardentasuna, integritate publikoa, eta Administrazioaren eta interes-taldeen arteko harremana.

Izan ere, gardentasunari buruzko foru-legean berriki egindako aldaketak beste aro bat ireki du: zabaldu egin ditu informazioaren publizitatea aktiboki egiteko betebeharrak, eskakizun berriak ezarri ditu agendak publikoak izan daitezen eta indartu egin du Interes-taldeen Erregistroaren eginkizuna.

Jardunaldi honen helburua da, araudia betetzeaz haratago, aldaketaren balioa ulertzen laguntzea, ikus dadin aldaketa horrek aukera ematen duela konfiantza, erabaki publikoen trazabilitatea eta kalitate demokratikoa hobetzeko.

Hau izanen da topaketaren egitura: esparrua ezarriko duen hitzaldi orokor bat, eta bi elkarrizketa-mahai. Aurreneko mahaiak erreformaren barne-dimentsioa jorratuko du: nola argitaratu agenda instituzionalak, nola bermatu bileren trazabilitatea, eta nola ziurtatu informazioa argia, homogeneoa eta herritarrentzat erabilgarria dela.

Bigarren mahaiak kanpoko eragileekiko harremana izanen du ardatz: Interes-taldeen Erregistroa, jokabide-kodeak, erabakietan eragiteko ekintzak publiko egitea eta erakundeekiko hartu-emana ordenatu behar duten arauak. Helburua da eredu berri baterantz aurrera egitea; eredu horretan, eragin legitimoa ikusgarria eta ulergarria izanen da, eta arau argien mende egonen da.

Jardunaldia honako hauei zuzendua dago: arduradun publikoak, zuzendaritzako langileak, Administrazioko talde teknikoak, erakunde interesdunak eta gobernu irekiari, gardentasunari eta integritate publikoari lotutako pertsonak.

Egitaraua

Eman izena jardunaldian eta parte hartu gogoeta-gune horretan; Administrazioaren eta interes-taldeen arteko harremanak gardenago, trazagarriago eta ulergarriago nola egin aztertuko dugu bertan..