Hiri-jarduketarako plan berezian parte hartzeko prozesuak berekin zekarren, bai aurrez aurreko lantegi bat, zeina aurreko irailaren 28an egin baitzen, Nafarroako Justizia Jauregiko prentsa aretoan, bai ekarpenak jasotzeko espazio bat irekitzea. Ondorioak eta emaitzak Parte-hartzearen gaineko txostenean erantsi dira.

Lanen azken emaitzarekin batera, alegia, NLEren Izapidetzeko Dokumentuarekin, Ondorio Baloratuen Txostena eginen da, Lurraldearen Antolamenduari eta Hirigintzari buruzko Foru Legearen testu bateginaren 7. artikuluan ezarritakoaren arabera. Txosten hori parte-hartzaile guztiei bidaliko zaie, eta parte hartzeko web-atarian argitaratuko da. Gainera, itzulera-saio espezifiko bat eginen da, parte-hartzeak azken proposamenaren diseinuan izan duen eragina azaltzeko.

Nafarroako Lurralde Estrategia berrikusteko proiektua jendaurrean jarriko da, eta gizarte- eta lurralde-eragileei entzunaldia emanen zaie bi hilabetez. Fase horren helburua ahalik eta pertsona fisiko eta juridiko gehienek dokumentua ezagutzea da eta bertan parte hartzea, haien ekarpenekin, ikuspuntuekin eta sentsibilitateekin NLEren proiektua hobetzeko baliagarria izan dadin.

LANKETA
Diagnostikoaren ondoren (aurreko fasea), 2021-2022 urteetan, Lurralde Antolamenduko, Etxebizitzako, Paisaiako eta Proiektu Estrategikoetako Departamentuak NLE berria lantzeari ekin dio, Nafarroako Gobernuko gainerako departamentuekin lankidetzan, lurralde-inpaktuko politikak bateratuko diren tresna bat izateko. Garatzeko, ahalik eta parte-hartze publiko handiena lortu nahi da, eta egungo helburuei eta erronkei erantzun nahi zaie, hala nola Garapen Jasangarriaren Helburuei (GJH), erronka demografikoari edo klima-aldaketari.

Nafarroako Lurralde Estrategia (aurrerantzean, NLE) 2005ean onartu zen Nafarroako lurraldearen garapena Europako Lurralde Estrategiaren (ELE) postulatuei jarraikiz bideratzeko hiru ardatz hauen inguruan: lurralde «lehiakor eta kohesionatu» bat lortzea, «irisgarria» eta «konektatua», eta «ikasia» eta «kalitatezkoa».

NLEren printzipioetako bat da Nafarroak egindako eta Nafarroarako dokumentua izan behar duela; horretarako, eragileen mapa bat proposatu da, Nafarroako lurralde osoko ideia eta sentsibilitate guztiak biltzeko. Hala, askotariko eragileen mapa bat sortu da, eragile sektorialak zein lurralde-eragileak identifikatuz; horien guztien ekarpenei esker, askoz ere zehatzago identifikatu ahal izanen dira arazoak eta ahalmenak.